संस्कृतशास्त्रशिक्षणविधयः

संस्कृतभाषा हि पञ्चसहस्राधिकवर्षेतिहासयुक्तायाः भारतीयसभ्यतायाः प्रतिनिधिः। महती बौद्धिकी, सामाजिकी, नैतिकी, अध्यात्मिकी च परम्परा एतद्भाषायाः राराज्यते। वेदोपनिषच्छास्त्रादिषु, रामायणभारतादिषु च परिदृश्यमानं साहित्यं मानवमूल्यानि च प्रागिव अद्यापि नितरां प्रासङ्गिकानि । उच्चतमविकासं प्राप्तायाः सभ्यतायाः प्रातिनिध्यं वहति। संस्कृते मानवजीवनसम्बद्धानां सर्वेषामपि पक्षाणाम् उत्तमोत्तमं ज्ञानं ननु सन्निहितम् । शास्ति नियमयतीति शास्त्रमिति व्युत्पत्त्या कुत्सितमार्गावलम्बिनम् अधः पतन्तं नरं सदुपदेशेन सन्मार्गं दर्शयन्तम् उर्ध्वगामिनं करोति शास्त्रम् । अन्ततश्च मोक्षं गमयतीति शास्त्राणां महोपकारकत्वं वर्तते ।